ANUNCIO De conformidade co acordo adoptado pola Xunta de Goberno Local en sesión ordinaria celebrada o día 6 de novembro de 2015, fanse públicas as bases para a elaboración dunha lista para a cobertura temporal de conductores para o transporte adaptado. 1º. OBXECTO DA CONVOCATORIA. A presente convocatoria ten por obxecto a elaboración dunha lista para a cobertura temporal de conductores para o servizo de transporte adaptado do concello de Muros mediante contrato de duración determinada. A duración de cada contrato será de seis meses. As funcións a desempeñar polos candidatos son as propias do transporte adaptado do concello, (manexo do vehículo, acompañamento e atención aos usuarios), así como outras funcións relacionadas e que sexan encargadas pola alcaldía ou concelleiro 2º. SISTEMA DE SELECCIÓN. O sistema de selección constará será o concurso-oposición, que se valorará de acordo co baremo establecido no punto 6 destas bases. 3º. REQUISITOS DOS ASPIRANTES. 3.1 Para poder tomar parte no proceso, será necesario que os/as aspirantes reúnan, na data de finalización do prazo de presentación de instancias, os seguintes requisitos: a) Ter a nacionalidade española, sen prexuízo do disposto no artigo 57 da Lei 7/2007 do 13 de abril do estatuto básico do empregado público. b) Ter cumpridos os 18 anos de idade, e non superar a idade máxima de xubilación. c) Non padecer enfermidade nin estar afectado por limitación física ou psíquica que sexa incompatible co desempeño das correspondentes funcións. d) Non ter sido separado do servizo de ningunha Administración Pública en virtude de expediente disciplinario nin atoparse inhabilitado, por sentenza firme, para o exercicio e) Esta en posesión do carne de conducir tipo B f) Estar en posesión dun curso de 100 horas relacionado co coidado de persoas dependentes ou 500 horas de experiencia en transporte adaptado 3.2. Todos os requisitos esixidos no apartado anterior deberán posuílos os aspirantes no día de remate do prazo para a presentación de solicitudes e conservalos, polo menos, ata a data do seu nomeamento como persoal laboral, no seu caso. 4º. ADMISIÓN DE ASPIRANTES. Os aspirantes deberán presentar a solicitude para participar no proceso selectivo no rexistro do Concello de Muros declarando cumprir todos os requisitos establecidos no punto anterior, ademais a seguinte documentación: -DNI -Documentación xustificativa do apartado anterior -Se é o caso, documentación acreditativa dos méritos. A experiencia laboral acreditarase mediante copia do contrato de traballo ou equivalente e vida laboral. Non se admitirá máis documentación que a presentada con anterioridade a data limite de presentación de solicitudes.
A solicitude tamén se poderá presentar por calquera outro medio establecido no artigo 38.4 da Lei 30/1992 de procedemento administrativo, neste caso é preciso remitir o mesmo día ao fax nº 981762257 copia da solicitude. O prazo para a presentación de solicitude rematará o vindeiro día 27 de novembro de 2015. A presentación da solicitude supón o coñecemento e aceptación expresa do contido destas bases. 5º. RELACIÓN DE ADMITIDOS E EXCLUÍDOS. Rematado o prazo de inscrición, publicarase a lista de admitidos e excluídos, tendo os aspirantes un prazo de catro días dende a publicación da mesma para presentar as reclamacións que consideren oportunas. No caso de non haber reclamacións esta lista provisional entenderase definitiva. 6.-PROCEDEMENTO SELECTIVO: 6.1 Os aspirantes serán convocados para cada exercicio en chamamento único mediante anuncio na páxina web e no taboleiro de anuncios do Concello, quedando decaídos no seu dereito os opositores que non compareceran a realizalo, salvo os casos debidamente xustificados e apreciados discrecionalmente polo tribunal. 6.2 Os aspirantes deberán presentarse para a realización de cada exercicio provistos do DNI, ou documento fidedigno acreditativo da súa personalidade a xuízo do Tribunal, así como dos medios materiais adecuados e necesarios para a práctica dos mesmos. En calquera momento o Tribunal poderá requirir aos opositores para que acrediten a súa identidade. 6.3 O procedemento selectivo será o de concurso-oposición, podendo os aspirantes acadar ata un máximo de 25 puntos, e que se desenvolvera como se detalla a continuación: A. Fase de oposición: a) Primeiro exercicio: Consistirá na realización dunha proba escrita ou tipo test relacionada coas funcións propia da prazas coa finalidade de avaliar a dispoñibilidade do aspirante e a súa adecuación ao posto de traballo. A puntuación máxima será de 10, debendo os aspirantes obter un mínimo de 5 puntos para superalo b) Segundo exercicio: Consistirá nunha redacción dun texto en galego de entre duascentas e duascentas cincuenta palabras sobre un tema proposto polo tribunal, nun tempo máximo de trinta minutos. Este exercicio ten carácter obrigatorio e eliminatorio e a súa cualificación será apto ou non apto. De conformidade co establecido no art. 35 do Decreto lexislativo 1/2008, do 13 de marzo, aproba o texto refundido da Lei de función pública de Galicia, quedarán exentos da realización deste exame os aspirantes que acrediten a posesión do certificado Celga 2, a validación do curso de iniciación da lingua galega ou equivalente, obtendo a cualificación de apto.
O tribunal poderá dispor a lectura dos exercicios polos aspirantes e formular, unha vez rematada a mesma, preguntas sobre o contido dos exercicios ou solicitar aclaracións. 6.4 Unicamente se publicarán as cualificacións dos aspirantes que superaron cada proba, o que se fará mediante anuncio no taboleiro e na paxina web do Concello de Muros, dispoñendo os candidatos un prazo de dous días hábiles para presentar as reclamacións que consideren oportunas. O tribunal poderá acordar a lectura publica dos exercicios que se fagan por escrito e pedirlles aclaracións aos aspirantes, se o xulga oportuno. B.- Fase de concurso de méritos: Rematada a fase de oposición realizarase a fase do concurso. Esta permitirá acadar ata un máximo de 15 puntos e serán obxecto de avaliación os seguintes méritos: a) Experiencia profesional: a.1.- Por experiencia profesional no transporte adaptado na Administración Local: 0,4 puntos por mes de servizo; a.2.- Por experiencia profesional no transporte adaptado noutras Administracións Públicas ou empresas privadas: 0,1 puntos por mes de servizo; A puntuación máxima outorgable polo concepto experiencia profesional será de 10 puntos. b) Formación: Cursos relacionados coa mobilidade e coidado de persoas dependentes, impartidos pola Administración Pública, entidades dependentes dela ou homologadas. 2.a) Cursos de máis de 200 horas: 0,80 punto 2.b) Cursos de máis de 100 horas: 0,60 puntos. 2.c) Cursos de 70 a 100 horas: 0,40 puntos. 2.d) Cursos de 40 a 70 horas: 0,30 puntos. 2.e) Cursos que 15 a 40 horas: 0,20 puntos. 2.f) Cursos de menos de 15 horas: 0,10 puntos. 2.g) Cursos, xornadas, etc. nos que non figure o número de horas: 0,05 puntos. A puntuación máxima outorgable polo concepto formación será de 3,5 puntos. c) Estar en posesión do carne BTP, 1,5 puntos 6.5 Para o caso de existir empate na puntuación final dos aspirantes, establecese, con carácter supletorio, e como criterio de prioridade a obtención da nota máis alta no primeiro exercicio de oposición e, de ser preciso, nos sucesivos segundo a orde establecida nestas bases. En caso de persistir o empate, terá preferencia o aspirante de maior idade
6.6 Rematado o proceso selectivo, o tribunal disporá a publicación da puntuación final e da orde de cualificación dos aspirantes aprobados, a cal virá dada pola suma das puntuacións obtidas no concurso e na oposición. 7º. COMPOSICIÓN DO TRIBUNAL. O tribunal estará composto por: PRESIDENTE:, Rosa Monteagudo Rey; suplente, Ines Tajes Grille SECRETARIO: Noelia Louro Louro suplente; Jose Manuel Mayo Priegue,. VOGAL, Ramón Manuel Lago Lago suplente; Xurxo-Xoan Rama Formoso O tribunal resultante non poderá constituírse e actuar sen a presencia, cando menos, da maioría simple dos seus membros. Así mesmo estes membros deberán absterse cando concorra algunha das causas previstas no artigo 29 da Lei 30/92, podendo os aspirantes, recusar ós membros do mesmo cando se dean algunha das circunstancias previstas no artigo 28 da citada Lei. 8º. RESOLUCIÓN. Concluído o proceso selectivo, o Tribunal publicará as puntuacións acadadas por cada un dos aspirantes no taboleiro de anuncios do Concello, establecendo un prazo de catro días naturais para a presentación de reclamacións. No caso de existiren, reunirase novamente o tribunal para resolvelas. Estas listas empregaranse para cubrir as necesidades do Concello de cubrir postos de conductor de transporte adaptado. Estas estarán en vigor ata a realización de outro proceso selectivo das mesmas ou similares características. O Tribunal cualificador elevará proposta de contratación segundo a orde de puntuación á Alcaldesa do Concello. Aprobada por decreto de Alcaldía, a proposta do Tribunal, notificarase ao interesado para que subscriba o contrato laboral. A comunicación da selección do candidato realizarase telefonicamente, deixando constancia do resultado do chamamento polo traballador que a realiza. Se o candidato rexeita a contratación cederá 5 postos na lista, agás que este rexeite sexa por estar de baixa médica, en tal caso deberá acreditalo por escrito e manterase no posto da lista ata o remate da baixa ou contrato. Os candidatos poderán optar a un contrato de seis meses. Se renuncian a el durante a súa vixencia, penalizarase con un descenso de 5 postos na lista. Os candidatos que rematen o seu contrato volveran ao posto que tiñan na lista. O chamamento farase sempre empezado polo primeiro candidato dispoñible na lista Os/as traballadores/as que teñen un contrato en vigor, poderán ampliar a duración do seu contrato ata ter cuberto un período de seis meses cun contrato a tempo parcial e outros seis a tempo completo, respectivamente 9º. INCIDENCIAS. O tribunal queda facultado para resolver cantas dúbidas e incidencias poidan xurdir no desenvolvemento deste proceso selectivo e en todo o non previsto nas bases, así como para a interpretación das mesmas.
10. NORMATIVA APLICABLE. O proceso selectivo rexerase polo establecido nas presentes bases. Así mesmo, será de aplicación a lexislación básica sobre emprego público, polo RD 896/1991, do 7 de xuño, pola normativa autonómica de desenvolvemento da anterior e, supletoriamente, polo previsto no Regulamento xeral de ingreso do persoal ao servizo da Administración do Estado. 11. RECURSOS. Contra esta resolución, que pon fin á vía administrativa, poderase interpor, con carácter potestativo, recurso de reposición no prazo dun mes perante o propio órgano que a ditou, ou ben recurso contencioso- administrativo no prazo de dous meses perante o Xulgado do Contencioso- Administrativo da Coruña. Os anteditos prazos contaranse desde o seguinte á publicación da resolución. Se se interpón o recurso de reposición, non se poderá acudir ao contencioso administrativo ata que o Concello resolva expresamente o primeiro ou se produza a súa desestimación presunta. O prazo de que dispón o Concello para ditar e notificar a resolución do recurso de reposición será o de un mes contado desde a presentación do recurso. Unha vez transcorrido ese tempo sen que se ditase e notificase a resolución, Vde. pode entender desestimado o recurso de reposición para os efectos de interpoñer o contencioso administrativo. Todo iso sen prexuízo de calquera outro recurso ou acción que xulgue oportunos.