BASES PARA A CONTRATACIÓN LABORAL TEMPORAL DUN ANIMADOR CULTURAL Primeira.- Obxecto da convocatoria Estas bases teñen por obxecto a contratación laboral temporal dun animador cultural durante catro meses coa finalidade de prestar o servizo de Animación sociocultural do Concello de Monfero, vinculada á subvención concedida pola Deputación Provincial a través do Programa FO206 de subvencións a concellos e entidades locais para a contratación de animadores culturais durante o ano 2016. As funcións a desempeñar serán as propias do Servizo de animación socio cultural do Concello de Monfero, concretamente: Coordinar e impartir o campamento urbano, apoio á organización de festas tradicionais, realización de programas de apoio na biblioteca municipal e na área de xuventude (clases de teatro, contacontos e clases de bailes tradicionais). Ademais colaborará nos programas de Cultura e Deportes da Deputación Provincial. Segunda.- Orzamento No orzamento municipal vixente existe crédito suficiente para facer fronte á dita contratación. Terceira.- Tipo de contrato e duración Contrato de duración determinada por obra ou servizo, a tempo parcial, regulado polo vixente art. 15 do Estatuto dos Traballadores e normativa de desenvolvemento, vinculado á subvención concedida, que se estenderá durante 4 meses Cuarta.- Retribucións Será o salario base e complemento singular de atención ao público que lle correspondan ao Grupo 3 do vixente convenio único da administración do estado. Quinta.- Xornada de traballo Xornada parcial (20 h/semanais), de luns a domingo, cos descansos que establece a Lei, o que representa un 53,33 % da xornada.
Sexta.- Requisitos dos/as aspirantes Para participar no proceso selectivo, os/as aspirantes deberán reunir os requisitos que a continuación se indican, referidos todos e cada un deles á data de remate do prazo de presentación de solicitudes: a) Teren nacionalidade española ou seren nacionais dalgún dos estados membros da Unión Europea ou nacionais daqueles Estados aos que se refire e nas condicións que establece o artigo 57 do Real Decreto Lexislativo 5/2015, polo que se aproba o texto refundido da Lei do estatuto Básico do Empregado Público. b) Teren cumpridos dezaseis anos e non exceder a idade máxima de xubilación forzosa. c) Estar en posesión dalgunha das seguintes titulacións: Técnico en animación socio cultural ou Diplomado en educación social. No seu defecto admitirase tamén a titulación en Maxisterio e outras titulacións universitarias. d) Non ter sido separado mediante expediente disciplinario do servizo de calquera das Administracións Públicas ou dos órganos constitucionais ou estatutarios das comunidades autónomas, nin atoparse en inhabilitación absoluta ou especial para empregos ou cargos públicos por resolución xudicial. No suposto de ser nacional doutro Estado, non atoparse inhabilitado ou en situación equivalente nin ter sido sometido a sanción disciplinaria ou equivalente que impida, no seu Estado, nos mesmos termos, o acceso ao emprego público. e) Non atoparse incurso en causa de incompatibilidade ou incapacidade. Tamén terán que acreditar no momento no que acepten o posto de traballo que se lles oferte, que reúnen o requisito de non ter sido condenado por sentenza firme por algún delito contra a liberdade e indemnidade sexual, mediante a aportación dunha certificación negativa do Rexistro Central de Delincuentes Sexuais ou autorización expedida a favor do Concello para que o comprobe de oficio. (Modificación do artigo 13.5 da Lei Orgánica 1/1996, de 15 de xaneiro, de Protección Xurídica do Menor, efectuada pola Lei 26/2015, de 28 de xullo) No suposto de que non acrediten estes requisitos, as/os solicitantes decaerán en tódolos seus dereitos e quedarán excluídos da selección.
Sétima.- Dereitos de exame. Para participar no proceso selectivo deberán aboarse, en concepto de taxas de exame, 15 euros. Porén, segundo o que establece o artigo 24.4 do Real decreto lexislativo 2/2004, do 5 de maio, polo que se aproba o texto refundido da lei reguladora das facendas locais, e a correspondente ordenanza fiscal: Terán unha redución do 30% da taxa, as persoas que sexan membros de familias numerosas de carácter xeral e especial, de conformidade co que dispón a Lei 40/2003, do 18 de novembro de protección de familias numerosas. Tal condición deberá acreditarse mediante o orixinal ou unha copia compulsada do título oficial establecido para o efecto. Terán unha redución do 40% da taxa, as persoas cunha discapacidade igual ou superior ao 33 por cento. Esta condición acreditarase mediante o orixinal ou unha copia compulsada do certificado de minusvalía emitido pola Dirección Xeral de Servizos Sociais, que deberá estar actualizado na data de finalización do prazo de presentación das solicitudes. Terán unha redución do 50% da taxa as persoas que figuren como demandantes de emprego en situación de desemprego durante o prazo de, polo menos, 12 meses anteriores á data da convocatoria. Para gozar desta bonificación, será requisito que, durante estes 12 meses, non rexeitasen ningunha oferta de emprego axeitada nin se negasen a participar, agás causa xustificada, en accións de promoción e formación, e que carezan do dereito de prestación por desemprego e de rendas superiores, no cómputo mensual, ao salario mínimo interprofesional. Estas condicións acreditaranse por medio de certificacións emitidas pola administración competente no momento da solicitude. Os beneficios fiscais anteriores non terán carácter acumulativo polo que, nos supostos de concorrencia de diversas causas que sexan a orixe do dereito a demandar os beneficios citados, a persoa interesada deberá optar só por un deles. No caso de que a persoa interesada non exercese a opción anterior, considerarase de oficio por orde de preferencia decrecente no que se encontre debidamente xustificado ou lle resulte máis favorable.
Oitava.- Órgano de selección O órgano de selección será colexiado e, como mínimo, constará dun Presidente, tres Vogais e un Secretario, que serán designados por resolución da Alcaldía de acordo co disposto polo art. 60 do Real Decreto Lexislativo 5/2015, polo que se aproba o texto refundido da Lei do estatuto Básico do Empregado Público. A súa composición axustarase aos principios de imparcialidade e profesionalidade dos seus membros, que será esixible a todos e cada un deles individualmente considerados, ben polos coñecementos profesionais que posúan da materia de que se trate ou polos seus coñecementos específicos sobre selección de persoal, e tenderase, así mesmo, á paridade entre muller e home. Deberán posuír titulación ou especialización igual ou superior á esixida para o acceso á praza convocada. O persoal de elección ou de designación política, os funcionarios interinos e o resto do persoal eventual non poderán formar parte deles. A pertenza aos órganos de selección será sempre a título individual, non puidendo ostentarse en representación ou por delegación de ninguén. Os membros dos tribunais deberanse de abster de formar parte destes cando concorran as circunstancias previstas no art. 28 da Lei 30/1992, notificándoo á autoridade convocante, ou cando realicen tarefas de preparación a probas selectivas nos cinco anos anteriores á publicación desta convocatoria. Os aspirantes poderán recusalos de acordo co disposto no art. 29 de dita Lei. O órgano de selección non poderá constituirse nin actuar sen a asistencia de máis da metade dos seus membros, titulares ou suplentes, indistintamente. Poderá dispor a incorporación de asesores especialistas se así o estiman necesario ou adecuado, que actuarán con voz pero sen voto. Así mesmo resolverá todas as dúbidas que poidan xurdir na aplicación das presentes bases. No que respecta á súa constitución e formación de voluntad, rexerase pola Lei de procedemento administrativo, estando facultada para interpretar as presentes bases, así como para resolver todas as dúbidas e os problemas que se poideran plantexar. Novena.- Publicidade da convocatoria A Convocatoria anunciarase mediante publicación dun anuncio no Boletín Oficial da Provincia da Coruña, no taboleiro de anuncios municipal, e na páxina web do concello: www.concellodemonfero.com.
Decima.- Procedemento de selección Concurso de méritos e entrevista Décimo primeira.- Presentación de solicitudes e admisión de candidatos As instancias nas que se solicite tomar parte no proceso de selección presentaranse no Rexistro de Entrada do Concello, no impreso que será facilitado neste, en horario de 9:00 a 14:30 horas, ou mediante as formas previstas no art. 38.4 da Lei 30/1992, do 26 de novembro, de réxime xurídico das Administracións Públicas e do procedemento administrativo común, durante o prazo de dez días naturais, a contar dende o seguinte ao da publicación do anuncio da convocatoria no BOP. Non se admitirán as solicitudes que non se formulen no modelo oficial que figura como anexo I nin as que se reciban no Concello unha vez aprobada pola Alcaldía a lista de aspirantes admitidos/as e excluídos/as definitiva, se for o caso, con independencia do procedemento utilizado para envialas. Para ser admitido para tomar parte no proceso de selección, bastará con que os/as aspirantes manifesten nas súas instancias que reúnen todos e cada un dos requisitos esixidos na base Sexta desta convocatoria, referidos ao día no que remate o prazo de presentación de solicitudes, debendo presentar xunto coa solicitude, a seguinte documentación: - Fotocopia compulsada do DNI ou Tarxeta de Residente. - Fotocopia compulsada da titulación esixida para participar na convocatoria. - Xustificante de abono da taxa de dereitos de exame. - Relación dos méritos que aleguen os/as aspirantes, pola orde que se establece nesta convocatoria. Canda a dita relación, uniranse os documentos xustificativos destes (orixinais ou fotocopias compulsadas). Non se tomarán en consideración nin se avaliarán aqueles méritos que non queden debidamente acreditados na forma que se establece nesta convovatoria. A documentación que se presente deberá estar numerada correlativamente. O segundo día hábil seguinte a aquel no que finalice o prazo de presentación de solicitudes (agás sábado), como máximo, acordarase, por Resolución da Alcaldía, a admisión e exclusión de
candidatos/as, se for o caso, e publicarase inmediatamente a lista de admitidos/as e excluidos/as no taboleiro de anuncios municipal, con indicación do día e hora estimada para o inicio das probas de selección (en función do número de candidatos/as admitidos/as), procurando que non se demore máis de cinco días hábiles, e así mesmo determinará a composición do órgano de selección. Durante o prazo dos dous días hábiles seguintes poderanse presentar reclamacións, que, so mesmo xeito, serán resoltas por resolución da Alcaldía o día hábil seguinte (excepto sábado) a aquel no que finalice o dito prazo. O resultado, no caso de que houbese modificacións ou reclamacións, publicarase inmediatamente no Taboleiro de Anuncios do Concello. Décimo segunda.- Valoración 1.- Valoración de méritos: Os aspirantes alegarán os seus méritos e acompañarán coa solicitude os documentos que os acrediten, que se valorarán de acordo ao seguinte: -Pola experiencia profesional no posto de ANIMADOR CULTURAL ou desempeñando traballos relacionados co posto a desenvolver, a xuízo do órgano de selección, con contrato laboral ou nomeamento como funcionario/a, desde o 01-01-2005 poderá concederse até un máximo de 2,5 puntos. a) 0,10 puntos por cada mes de traballo, a xornada completa, na Administración local e noutras administracións públicas. Ata un máximo de 2 puntos b) 0,05 puntos por cada mes de traballo, a xornada completa, na empresa privada. Ata un máximo de 0,5 puntos. A experiencia profesional xustificarase mediante un informe de vida laboral expedido pola Tesourería Xeral da Seguridade Social, no que se especifican os días cotizados en cada contrato, que serán os que teñan en conta (en períodos de 30 días) para valorar e puntuar a experiencia laboral. Dito informe irá acompañado dos contratos de traballo correspondentes, e dun documento aclaratorio no caso de que non especificasen o seu obxecto con claridade e precisión, e as súas prórrogas, no seu caso, ou un certificado da empresa ou un expedido pola Administración correspondente.
-Por titulacións relacionadas co posto de traballo a desenvolver, poderanse conceder un máximo de 1,5 puntos, valorando: - Por título de Técnico en Animación socio cultural ou Diplomado en Educación Social ou habilitado: 1,5 puntos. - Por título de Licenciado: 1 punto por título. - Por título de Diplomado: 0,5 puntos por título. -Por cursos de formación relacionados co traballo que se vai desenvolver e informática, a xuicio do órgano de selección e impartidos, organizados, promovidos ou homologados pola administración pública, universidades, centros públicos ou concertados, sindicatos e organismos oficiais dende o 01-01-2010, poderanse conceder un máximo de 2 puntos, valorando: - De menos de 40 horas de duración: 0,10 punto por cada curso. - De 40 horas e ata 99: 0,25 puntos por curso. - De máis de 100 horas: 0,5 puntos por curso. - Curso de monitor de tempo libre: 0,5 puntos. - Calquera título oficial en lingua estranxeira de nivel B1: 0,5 puntos. -Por cursos de formación, ou a súa validación, relacionados co coñecemento do idioma galego, só se computará o de maior nivel acreditado, de acordo co seguinte: - Celga 3: 0,5 puntos. - Celga 4: 1 punto. -Por estar en posesión do permiso de conducir clase B: 1 punto -Por dispor dun medio de transporte, propio ou cedido: 1 punto Os cursos xustificaranse mediante fotocopia dos certificados, diplomas, documentos ou títulos acreditativos.
A posesión do carné de conducir B acreditarase mediante unha fotocopia deste e a disposición de medio de transporte mediante calquera medio de proba válido en dereito Se os documentos acreditativos de calquera dos méritos alegados ofrecesen dúbidas, non se terán en conta os méritos que se pretendan acreditar. Non se admitirán copias nin fotocopias simples. Non se terán en conta os méritos que non se alegasen ou que non estean documentalmente acreditados. O órgano de selección poderá acordar a práctica das probas ou entrevistas que estime convenientes. Neste caso, a orde de actuación será a que estableza a correspondente resolución da Secretaría Xeral para a Administración Pública. 2.- Entrevista Persoal Realizarase unha entrevista persoal e versará sobre as materias do traballo a desenvolver. Puntuarase ata un máximo de 2 puntos. Décimo terceira.- Selección O órgano de selección reunirase á hora determinada polo Sr. Alcalde de acordo co indicado na base décima, e despois de ser anunciado no taboleiro de anuncios do Concello, para realizar a selección e propoñer á Alcaldía a designación do candidato que maior puntuación obtivesen. Poderase deixar deserta a convocatoria se se considera procedente. No caso de empate, éste resolverase a favor del aspirante que maior puntuación obtivese en experiencia profesional, efectuándose un sorteo público, no mesmo acto, se continuara o empate. Unha vez realizada a selección proporase á Alcaldía a elaboración dunha listaxe cos restantes candidatos, por orde da puntuación obtida, para os efectos exclusivos de cubrir o posto, no caso de que algún dos seleccionados non puidese ser nomeado, causase baixa ou outras incidencias. A listaxe de aspirantes será aprobada por resolución da Alcaldía e publicarase no Taboleiro de anuncios do Concello para os efectos de notificación a todas as persoas participantes e os demais interesados. Contra a resolución aprobatoria das listaxes, que agotará a vía administrativa, poderá interpoñerse un recurso contencioso-administrativo segundo o que dispón a normativa vixente. As listaxes permanecerán en vigor mentres dure o servizo. Décimo cuarta.- Incorporación
O/os que resulten seleccionado/os, dentro dos tres días hábiles seguintes ao da publicación do resultado no Taboleiro de Anuncios Municipal, tendo tal publicación efectos de requirimento, deberá de achegar, no caso de que non o fixera con anterioridade, a seguinte documentación: -Declaración de non ter sido separado mediante expediente disciplinario do servizo de calquera das Administracións Públicas ou dos órganos constitucionais ou estatutarios das Comunidades Autónomas, nin atoparse en inhabilitación absoluta ou especial para empregos ou cargos públicos por resolución xudicial. No suposto de ser nacional doutro Estado, declaración xurada ou promesa de non atoparse inhabilitado ou en situación equivalente nin ter sido sometido a sanción -Declaración xurada de non atoparse incurso en ningunha causa de incapacidade e incompatibilidade de conformidade coa lexislación vixente. -Certificado médico acreditativo de posuír a capacidade funcional para o desenvolvemento das tarefas habituais da praza á que se aspira, e no que se fará constar que non se padece enfermidade ou limitación física ou psíquica incompatible coas funcións do posto. - Certificado de delitos de natureza sexual Unha vez achegada a documentación, será nomeado, por resolución da Alcaldía, persoal laboral temporal do concello para o cargo para o que foi seleccionado e, previa sinatura do correspondente contrato e alta na Seguridade Social, haberá de incorporarse ao seu posto. Quen dentro do prazo de tres días indicado, salvo causa de forza maior, non presentara a documentación, non poderá ser contratado, quedando anuladas todas as actuacións, sen menoscabo da responsabilidade na que puidese incorrer por falsidade na súa instancia, pasando a ocupar o seu posto o seguinte candidato por orde da puntuación obtida. Coa finalidade de axilizar os trámites, os chamamentos ou requirimentos aos seguintes candidatos efectuaranse telefonicamente, contactándose con eles no número de teléfono que deixen de referencia na solicitude, pasando ao seguinte candidato no suposto de que no se contactase co que correspondera despois de tres chamadas en horas diferentes ao longo de dous días. A presente convocatoria e cantos actos administrativos se deriven dela poderán ser impugnados polos interesados nos casos e na forma que establece a Lei 30/1992, de 26 de novembro, de réxime xurídico das Administracións Públicas e do procedemento administrativo común.
ANEXO I SOLICITUDE PARA TOMAR PARTE NA CONVOCATORIA DO CONCELLO DE MONFERO PARA A CONTRATACIÓN LABORAL TEMPORAL DUN ANIMADOR CULTURAL D./D.ª con DNI, con domicilio para os efectos de notificación en teléfono, e correo electrónico EXPOÑO: 1.-Que tiven coñecemento da convocatoria anunciada polo Concello de Monfero para a contratación laboral temporal indicada. 2.-Que coñezo e acepto as bases que rexen a dita contratación e que reúno os requisitos esixidos. 3.-Que estou capacitado/a para o desempeño do posto e que non estou incurso/a en prohibición para me contratar nin me atopo en situación de incompatibilidade. 4.-Que desexo tomar parte na convocatoria para o que achego a fotocopia compulsada do meu DNI ou Tarxeta de Residente. 5.-Que no dorso relaciono os méritos que alego e achego a documentación acreditativa. 6.-Que presento toda a documentación numerada correlativamente. Por iso, SOLICITO: Ser admitido/a no correspondente proceso selectivo. Monfero, de de 2016 SR. ALCALDE-PRESIDENTE DO CONCELLO DE MONFERO De conformidade co disposto na Lei orgánica 15/1999, de protección de datos de carácter persoal, informámoslle de que os datos recollidos neste documento formarán parte dun ficheiro automatizado, propiedade do Concello de Monfero, cuxa finalidade é a súa xestión para o correcto funcionamento deste. Vostede poderá exercer os dereitos de acceso, rectificación, cancelación ou oposición, segundo o disposto na Lei, se se pon en contacto co noso Dpto. de Dereitos. ARCO no seguinte enderezo: Rebordelo s/n, 15618 Monfero, A Coruña.
Monfero, 22 de xuño de 2016. O Alcalde, DILIXENCIA: Extendese para acreditar que as presentes bases foron aprobadas po acordo da Xunta de Goberno Local do día da data. Monfero, 22 de xuño de 2016. O Secretario,