SOLICITUDE ANTICIPADA DE ADMISIÓN (PREINSCRICIÓN) EN TITULACIÓNS CON LÍMITE DE PRAZAS EXISTENTES NAS TRES UNIVERSIDADES DO SISTEMA UNIVERSITARIO DE GALIGIA (SUG) PARA O CURSO 2010-2011 (CONVOCATORIA DE XUÑO) A Comisión Interuniversitaria de Galicia (CiUG), en virtude das competencias que ten atribuídas consonte o previsto na Orde do 11 de maio de 2010, (DOG do 19 de maio de 2010), pola que se regulan as condicións para o acceso ás ensinanzas universitarias oficiais de grao e os procedementos de admisión ás tres universidades do sistema universitario de Galicia para o curso 2010-2011, resolve abrir o prazo de solicitude anticipada de admisión en titulacións con límite de prazas existentes no Sistema Universitario de Galicia (SUG) para o vindeiro curso 2010-2011, dirixido ao alumnado que reúna os seguintes 1º REQUISITOS a) Alumnado do SUG e de fóra do SUG coa PAU aprobada en anos anteriores e que non se presenten no actual. b) Titulados/as de Formación Profesional do SUG, agás os que se vaian a presentar á PAU na convocatoria de xuño de 2010. c) Titulados/as de Formación Profesional de fóra de Galicia. d) Alumnado de centros públicos españois no estranxeiro e alumnado estranxeiro de países non membros da Unión Europea coa PAU aprobada no curso 2008-2009 ou que se presente á PAU na convocatoria de xuño do ano en curso. e) Alumnado de Distritos Universitarios de fóra de Galicia e alumnado de países membros da Unión Europea que se presente á PAU na convocatoria de xuño do ano en curso. f) Titulados/as universitarios anteriores á convocatoria de xuño de 2010, agás os que se vaian a presentar á PAU na convocatoria de xuño do ano en curso. g) Alumnado que superase as Probas de Acceso á Universidade específicas para Maiores de 25 anos. h) Alumnado do SUG que superase as Probas de Acceso á Universidade específicas para Maiores de 45 anos. i) Alumnado de Distritos Universitarios de fóra de Galicia que, tendo aprobada a PAU en anos anteriores, desexe solicitar praza no SUG. j) Alumnado de países membros da Unión Europea que reunindo os requisitos en anos anteriores para acceder á universidade no seu país de orixe, desexe solicitar o acceso á universidade española mediante a Credencial expedida (neste ano) pola UNED. 1
2º PRAZO, LUGAR E HORARIO O período de solicitude anticipada de admisión abranguerá do 7 de xuño ao 5 de xullo de 2010, ambos os dous inclusive, das 9,00 ás 14,00 horas. Os lugares onde se presentarán as solicitudes serán os LERD (Anexo I). Aínda que se algún estudante fixo preinscrición en anos anteriores e non ten ningunha modificación nos datos persoais ou académicos podería presentar a solicitude por medio da Aplicación Informática Nerta (www.edu.xunta.es/nerta/alumnado). 3º DOCUMENTOS Comúns para todos os/as solicitantes: * Fotocopia do DNI ou Pasaporte (no caso de estranxeiros). * Solicitude de admisión debidamente cuberta segundo o modelo oficial. Específicos para o alumnado de Solicitude Anticipada: a) Alumnado do SUG que aprobase a PAU con anterioridade ao curso actual: * Fotocopia da Tarxeta de Cualificación da PAU. * O alumnado de COU que teña superada a PAU en anos anteriores, deberá presentar unha certificación académica oficial das cualificacións obtidas nos estudos de BUP e COU ou, no seu caso, fotocopia compulsada do Libro de Cualificación Escolar co obxecto de facer o cálculo da súa nota media de expediente de acordo co disposto na nova normativa (Resolución do 11 de abril de 2008, da Secretaría General de Educación BOE do 24 de abril de 2008). b) Alumnado con Probas de Madurez ou con Exame de Estado: * Certificación das súas notas do Bacharelato e das correspondentes á Proba de Acceso á Universidade. c) Alumnos/as estranxeiros ou españois, con estudos validados que teñan aprobada a PAU na Universidade Nacional de Educación a Distancia (UNED): * Fotocopia da Tarxeta de Cualificación da Proba de Acceso á Universidade e documento acreditativo da súa nacionalidade. d) Alumnos/as españois, con estudos validados que teñan aprobada a PAU polo Réxime Xeral: * Fotocopia da Tarxeta de Cualificación da Proba de Acceso á Universidade. e) Alumnado coa PAU aprobada noutra Comunidade Autónoma: * Fotocopia da Tarxeta de Cualificación da Proba de Acceso á Universidade. f) Titulados/as do SUG de FP 2, Módulos Profesionais de Nivel 3 e de Ciclos Formativos de Grao Superior: * Certificación expedida polo centro das cualificacións obtidas nos respectivos estudos, segundo o modelo oficial que se facilitará pola CiUG aos centros. * Acreditación de ter aboadas as taxas para a expedición do título. 2
g) Titulados/as, de fóra de Galicia, de FP 2, Módulos Profesionais de Nivel 3 e de Ciclos Formativos de Grao Superior: * Certificación expedida polo centro das cualificacións obtidas nos respectivos estudos, para os estudantes de Ciclos Formativos de Grao Superior na certificación deberán constar as cualificacións obtídas nos Módulos. * Acreditación de ter aboadas as taxas para a expedición do título. h) Titulados/as universitarios ou equivalentes: * Certificación académica oficial das cualificacións obtidas nos estudos da súa titulación. * Acreditación de ter aboadas as taxas para a expedición do título. i) Alumnos/as con discapacidade: * Ademais dos documentos comúns e específicos, os alumnos/as que desexen acollerse á cota de prazas reservada para este colectivo deberán presentar un Certificado coa Cualificación de Minusvalía expedido polos Equipos de Valoración e Orientación das Delegacións Provinciais da Consellería de Sanidade. j) Deportistas de Alto Nivel e Alto Rendemento: * Ademais dos documentos comúns e específicos, os alumnos/as que desexen acollerse á cota de prazas reservada para este colectivo deberán presentar un certificado de figurar na relación anual de Deportistas de Alto Nivel publicada no "Boletín Oficial del Estado" polo Consejo Superior de Deportes (RD 1856/1995, do 17 de novembro - BOE do 14 de decembro), ou un certificado de figurar na relación de Deportistas Galegos de Alto Nivel publicada no Diario Oficial de Galicia pola Consellería de Familia, Xuventude, Deporte e Voluntariado (Decreto 6/2004, do 8 de xaneiro DOG do 19 de xaneiro). k) Estudantes de centros públicos españois no estranxeiro: * Certificación académica oficial das cualificacións obtidas nos seus estudos. l) Estudantes Maiores de 25 anos con probas específicas superadas: * Certificación académica oficial das cualificacións obtidas nas probas. m) Estudantes Maiores de 45 anos con probas específicas superadas no SUG: * Certificación académica oficial das cualificacións obtidas nas probas. n) Alumnos/as de países membros da Unión Europea que reúnan os requisitos para acceder á universidade nos seus países de orixe: * Credencial expedida pola UNED (neste ano) 3
4º DOCUMENTOS (Requisitos) 4.1 Presentación da documentación: de conformidade co disposto no artigo 38.4 da Lei 30/1992, de Réxime Xurídico das Administracións Públicas e do Procedemento Administrativo Común, os documentos que se dirixan a esta Comisión poderán presentarse nalgún dos seguintes rexistros: a) Nos Rexistros xerais das tres universidades do SUG ou nos rexistros auxiliares. b) Nos Rexistros oficiais da Administración Xeral do Estado ou das Comunidades Autónomas. c) Nos rexistros de entidades que integran a Administración Local, sempre que se asinase o oportuno convenio. d) Nas oficinas de correos de España, na forma que regulamentariamente está establecida. e) Nas representacións diplomáticas ou oficinas consulares de España no estranxeiro. 4.2 COMPULSAS OU COTEXO DE DOCUMENTOS EXPEDIDOS EN ESPAÑA: só serán válidas as compulsas que realicen os seguintes órganos ou unidades administrativas: a) Rexistros relacionados no apartado 4.1. b) Unidade administrativa onde se tramita o expediente. c) Organismo español que expediu o documento. d) Notarios españois. e) Representación diplomática española, no caso de que se presente no estranxeiro. Non se admitirá ningún documento compulsado ou cotexado por órganos ou unidades administrativas distintas ás citadas neste apartado. Neste caso, requerirase a presentación do orixinal para a súa comprobación pola unidade administrativa que ten encomendada a súa tratmitación. Tamén se requerirá a presentación do orixinal cando nas copias compulsadas non se identifique claramente o organismo que expide a compulsa ou o cargo, nome e apelidos de quen as asina. NOTA IMPORTANTE Todas as fotocopias estarán compulsadas, ou deberase exhibir o orixinal destas no momento de presentación da solicitude. Este último requisito é obrigado cando se trate de fotocopias do Libro Escolar. Todos os documentos deberán presentarse coa solicitude de admisión ou, no seu caso, dentro dos dez días seguintes ao peche do prazo de solicitude (ata o 16 de xullo). A falta de presentación dos documentos no prazo sinalado anteriormente invalida a instancia. No caso de que a solicitude de admisión sexa remitida por correo, deberá figurar nesta a data de envío autenticada polo organismo correspondente. 5º SOBRE DE DOCUMENTACIÓN A documentación necesaria para facer a preinscrición, así como a información relativa ao proceso de admisión en titulacións con límite de prazas, atópase no sobre de documentación que se recollerá nos LERD, aboando previamente o importe deste. Exceptúanse deste requisito aos alumnos estranxeiros e aos procedentes de Comunidades Autónomas de fóra de Galicia que remitan a solicitude por correo dende o seu lugar de residencia. 4
6º NORMATIVA Cada alumno poderá presentar un único impreso de solicitude, no que indicará por orde de preferencia as titulacións nas que desexa matricularse. Na solicitude de admisión poderanse solicitar ata cinco titulacións diferentes, podendo chegar ata un máximo de dez se as solicitudes corresponden a titulacións iguais impartidas en diferentes centros. É fundamental a orde de preferencia, posto que o alumno/a será admitido nunha única titulación, que será aquela de maior preferencia na que acade a nota do último alumno admitido. As titulacións solicitadas en menor preferencia a aquela na que resulte admitido eliminaranse automaticamente das listas de espera. É imprescindible indicar correctamente o código da titulación (ver Anexo II), xa que a asignación de prazas se leva a cabo informaticamente a partir deste número do código que implica o nome da titulación e o campus no que se imparte. Na convocatoria de setembro non se ofertarán as titulacións que teñan todas as prazas esgotadas pola matrícula de xullo, ou aquelas nas que a CiUG estimase que existen datos obxectivos que aconsellen esta acción. No caso dos titulados universitarios, haberá un único prazo de solicitude correspondente á convocatoria de xuño, de acordo co disposto no artigo 13º.3. do Real Decreto 69/2000, do 21 de xaneiro, sobre procedementos de selección para o ingreso en centros universitarios (BOE do 22 de xaneiro). PRIORIDADE TEMPORAL NA ADXUDICACIÓN A asignación de prazas na titulación farase atendendo ós seguintes criterios de preferencia: Para o acceso ás titulacións con límite de prazas non existe unha nota determinada previamente, senón que esta depende do número de prazas existentes para a titulación, do número de solicitantes e das cualificacións que estes acaden. Esta "nota de acceso" ou "nota de corte" correspóndese coa nota do último alumno/a admitido/a en cada titulación. DISTRIBUCIÓN DE PRAZAS POR COLECTIVOS Do número de prazas ofertadas en cada titulación, reservaranse as porcentaxes que a continuación se indican para os seguintes colectivos: a) Cota Xeral: As prazas da cota xeral adxudicaranse aos estudantes que reúnan algún dos requisitos seguintes: a) Ter superada a proba de acceso á universidade establecida no Real Decreto 1892/2008, do 14 de novembro, ou segundo normativas anteriores, estando en posesión de calquera dos títulos e certificados que se indican a continuación: - Título de bacharel relacionado nos artigos 37 e 50.2 da Lei orgánica 2/2006, do 3 de maio, de Educación. 5
- Título de bacharel establecido pola Lei orgánica 1/1990, do 3 de outubro, de Ordenación Xeral do Sistema Educativo. - Certificado acreditativo de ter superado o curso de orientación universitaria. - Certificado acreditativo de ter superado o curso preuniversitario. - Calquera outro título que o Ministerio de Educación declare equivalente, a estes efectos, ao título de Bacharel regulado pola Lei orgánica 2/2006, do 3 de maio, de Educación. b) Cumprir os requisitos esixidos para o acceso á universidade nos sistemas educativos de Estados membros da Unión Europea ou doutros Estados cos que España subscribise acordos internacionais nesta materia, segundo o previsto no artigo 38.5 da Lei orgánica 2/2006, do 3 de maio de Educación. c) Posuír un título de técnico superior de formación profesional, ensinanzas de artes plásticas e deseño ou técnico deportivo superior, aos que se refiren os artigos 44, 53 e 65 da Lei orgánica 2/2006, do 3 de maio de Educación, ou títulos equivalentes. d) Estar en condicións de acceder á universidade segundo ordenacións educativas anteriores á establecida polo Real Decreto 1892/2008, do 14 de novembro, non contempladas nos apartados anteriores. b) Titulados/as universitarios ou equivalentes: Para o alumnado que estea en posesión dunha titulación universitaria oficial ou equivalente reservarase unha porcentaxe do 2 por 100 das prazas totais de cada titulación. c) Alumnado con discapacidade: Para os alumnos/as que teñan recoñecido un grao de discapacidade igual ou superior ao 33%, ou padezan menoscabo total da fala ou perda total da audición, así como para aqueles estudantes con necesidades educativas especiais permanentes asociadas ás condicións persoais de discapacidade que durante a súa escolarización anterior precisasen recursos extraordinarios, reservarase unha porcentaxe do 5 por 100 das prazas totais de cada titulación. d) Alumnado coa Cualificación de Deportista de Alto Nivel: Para os estudantes que, reunindo os requisitos académicos correspondentes, o Consejo Superior de Deportes cualifique e publique como Deportistas de Alto Nivel antes do 15 de xuño do ano en curso, así como aqueles que a Comunidade Autónoma de Galicia clasifique como Deportistas Galegos de Alto Nivel e que figuren como tales na relación publicada no DOG, ou que cumpran os requisitos que estableza o Consejo de Coordinación Universitaria, reservarase unha porcentaxe do 3 por 100 das prazas totais de cada titulación, agás nas titulacións de Grao en Ciencias da Actividade Física e do Deporte (INEF), e Grao en Fisioterapia, na que se incrementará nun 5 por 100. e) Maiores de 25 anos: Para os estudantes maiores de 25 anos que teñan superada a proba de acceso á universidade reservarase unha porcentaxe do 2 por 100 das prazas totais de cada titulación. f) Maiores de 45 anos: Para os estudantes maiores de 45 anos que teñan superada a proba de acceso á universidade reservarase unha porcentaxe do 2 por 100 das prazas totais de cada titulación. 6
De acordo co disposto no artigo 48.2 do Real Decreto 1892/2008, do 14 de novembro, as prazas obxecto de reserva que queden sen cubrir polos anteditos colectivos, serán acumuladas ás ofertadas polo réxime xeral, en cada unha das convocatorias de admisión excepto o disposto para os deportistas de alto nivel no Real Decreto 971/2007, do 13 de xullo, sobre deportistas de alto nivel e alto rendemento. CRITERIOS DE VALORACIÓN PARA A ADXUDICACIÓN As solicitudes de admisión realizadas polo alumnado dos diferentes colectivos, ordenaranse aplicando o criterio que, dos enumerados a continuación, corresponda a cada colectivo. a) Estudantes que superen a proba de acceso á universidade regulada polo Real Decreto 1892/2008, do 14 de novembro. A nota de admisión calcularase coa seguinte fórmula: Nota de admisión = 0.6 * NMB + 0.4 * CFX + a * M1 + b * M2 NMB = Nota media do bacharelato CFX = Cualificación da fase xeral M1, M2 = As dúas materias superadas da Fase Específica con mellor cualificación unha vez aplicados os parámetros de ponderación a, b = Parámetros de ponderación das materias da fase específica b) Estudantes que teñan superada a proba de acceso á universidade segundo normativas anteriores á establecida pola Lei Orgánica 2/2006, do 3 de maio, de Educación. A nota de admisión calcularase coa seguinte fórmula: Nota de admisión = CDA + a * C1 + b * C2 CDA = Cualificación definitiva de acceso á universidade superada con anterioridade ao ano 2010 C1, C2 = As dúas materias do segundo exercicio da Proba de Acceso que fai valer, cun valor mínimo de 5 puntos, con maior cualificación unha vez aplicados os parámetros de ponderación a,b = Parámetros de ponderación das materias da fase específica No obstante o anterior, poderán presentarse á Fase Específica da Proba de Acceso á Universidade establecido polo Real Decreto 1892/2008, do 14 de novembro, neste caso a nota de admisión calcularase coa seguinte fórmula: Nota de admisión = CDA + a * M1 + b *M2 CDA = Cualificación definitiva de acceso á universidade superada con anterioridade ao ano 2010 M1, M2 = As dúas materias superadas da Fase Específica con mellor cualificación unha vez aplicados os parámetros de ponderación a,b = Parámetros de ponderación das materias da fase específica 7
Sen prexuízo do anterior, poderán optar por realizar a nova proba de acceso, ben sexa completa ou en calquera das súas fases, xeral ou específica. c) Estudantes procedentes de sistemas educativos de Estados membros da Unión Europea ou doutros Estados cos que España suscribe Acordos Internacionais nesta materia, previsto no artigo 38.5 da Lei Orgánica 2/2006, do 3 de maio, de Educación, sempre que cumpran os requisitos esixidos no seu respectivo país para o acceso á universidade. A nota de admisión será a cualificación que conste na Credencial expedida pola Universidade Nacional de Educación a Distancia (UNED). Cando estes estudantes se presenten na UNED á fase específica da proba de acceso á universidade establecida polo Real Decreto 1892/2008, do 14 de novembro, a nota de admisión calcularase coa seguinte fórmula: Nota de admisión = CC + a * M1 + b * M2 CC = Cualificación da Credencial expedida pola UNED M1, M2 = As cualificacións das materias da Fase Específica que proporcionen mellor nota de acceso a, b = Parámetros de ponderación das materias da fase específica No caso de que na credencial expedida pola UNED non conste cualificación, a nota de admisión calcularase cunha cualificación de credencial de cinco puntos. d) Estudantes con probas de madurez, que superasen o bacharelato superior e o curso preuniversitario. A nota de admisión será a nota media resultante de promediar a puntuación obtida, no seu día, nas probas de madurez e a nota media do expediente académico do bacharelato superior e do curso preuniversitario, calculada, se é o caso, de acordo co disposto na Resolución do 11 de abril de 2008, da Secretaría Xeral de Educación, pola que se establecen as normas para a conversión das cualificacións do expediente académico do alumnado de bacharelato de cualitativas en cuantitativas. e) Alumnado que superase o COU con anterioridade ao curso 1974/75. A nota de admisión será a nota media resultante de promediar a nota media do bacharelato unificado polivalente ou, no seu caso, do bacharelato superior e do curso de orientación universitaria, calculada, se é o caso, de acordó co disposto na Resolución do 11 de abril de 2008, da Secretaría Xeral de Educación, pola que se establecen as normas para a conversión das cualificacións do expediente académico do alumnado de bacharelato de cualitativas en cuantitativas. f) Alumnado que teña cursado plans de estudos anteriores ao ano 1953. A nota de admisión será a nota media do expediente académico do bacharelato, calculada, se é o caso, de acordó co disposto na Resolución do 11 de abril de 2008, da Secretaría Xeral de Educación, pola que se establecen as normas para a conversión das cualificacións do expediente académico do alumnado de bacharelato de cualitativas en cuantitativas. 8
g) Titulados/as universitarios ou equivalentes. Para os plans de estudos estruturados en créditos: Suma dos créditos superados multiplicando cada un deles polo valor da cualificación que corresponda, a partir das seguintes equivalencias: aprobado = 1; notable = 2; sobrasaliente = 3; matrícula de honra = 4. O resultado dividirase polo número de créditos totais da ensinanza correspondente. Para os plans de estudos non estruturados en créditos: Suma das notas das materias superadas multiplicando cada unha delas polo valor da cualificación que corresponda, a partir das seguintes equivalencias: aprobado = 1; notable = 2; sobrasaliente = 3; matrícula de honra = 4. O resultado dividirase polo número de créditos totais da ensinanza correspondente. No caso de disciplinas cuadrimestrais ou semestrais, contabilizarase a metade do valor da cualificación na suma (aprobado = 0.50; notable = 1; sobresaliente = 1.50; matrícula de honra = 2) e a metade da materia no divisor. Para os dous plans de estudos, aos efectos do cálculo da nota media do expediente universitario, non se terán en conta as materias que aparezan superadas sen nota (apto ou non apto), nin as materias voluntarias. As materias validadas terán o valor equivalente a un aprobado. h) Titulados/as de Ciclos Formativos (LOE). A nota media do expediente académico calcularase mediante a suma das cualificacións numéricas dos módulos, cualificados de 1 a 10, sen decimais, e dividindo o resultado obtido polo número total destes. Aos efectos do cálculo da nota media, non será computado o módulo de formación en centros de traballo, nin aqueloutros módulos que fosen obxecto de validación. A nota media do expediente expresarase con dúas cifras decimais e arredondada á centésima máis próxima e en caso de equidistancia á superior. A nota de admisión calcularase coa seguinte fórmula: Nota de admisión = NMC + a * M1 + b * M2 NMC = Nota media do ciclo formativo M1, M2 = As dúas mellores cualificacións dos módulos do ciclo formativo de grao superior, quedando exceptuados os módulos de formación e orientación laboral, formación en centros de traballo e empresa e cultura emprendedora a, b = Parámetros de ponderación dos módulos do ciclo formativo A nota de admisión incorporará as cualificacións dos módulos profesionais do ciclo formativo de grao sempre que a familia profesional á que pertence o título estea adscrita á rama de coñecemento das ensinanzas universitarias oficiais de grao en que se solicite ser admitido, de acordo co disposto no Anexo III desta convocatoria sobre o acceso á universidade dende a Formación Profesional. 9
Os parámetros de ponderación ( a ou b ) dos módulos serán iguais a 0.1 para o acceso ás ensinanzas universitarias oficiais de grao do sistema universitario de Galicia. i) Titulados con estudos equivalentes a Ciclos Formativos (LOE) Os estudantes que acrediten estar en posesión dos títulos da formación profesional de sistemas educativos anteriores (técnico superior de formación profesional de segundo grao e técnico superior de módulos profesionais de nivel 3 ou títulos equivalentes). A nota media do expediente académico calcularase de acordo co disposto na Resolución do 4 de xuño de 2001 da Dirección General de Universidades, pola que se establecen as normas para o cálculo da nota media do expediente académico dos alumnos/as que acceden ás ensinanzas universitarias conducentes á obtención de títulos oficiais dende a Formación Profesional. Os estudantes que acrediten estar en posesión de estudos cursados no estranxeiro e validados por Formación Profesional. A nota media do expediente académico de Formación Profesional calcularase de acordo co disposto na Resolución do 7 de maio de 1996 (BOE do 15 de maio). j) Maiores de 25 anos con probas específicas superadas reguladas polo Real Decreto 1892/2008, do 14 de novembro. A nota de admisión será a cualificación final obtida na proba. Para a admisión ás ensinanzas universitarias oficiais de grao nas que se produza un procedemento de concorrencia competitiva, é dicir, no que o número de solicitudes sexa superior ao de prazas ofertadas, terán opción preferente a efectos de ingreso, os alumnos e as alumnas que cursasen na proba de acceso unha opción vinculada á rama do coñecemento da ensinanza á que se pretende acceder, de acordo co disposto no Anexo IV desta convocatoria. Os estudantes que teñan superada a proba de acceso á universidade de maiores de 25 anos segundo normativas anteriores á establecida pola Lei orgánica 2/2006, do 3 de maio, de Educación. A nota de admisión será a cualificación final obtida na proba. Para a admisión ás ensinanzas universitarias oficiais de grao nas que se produza un procedemento de concorrencia competitiva, é dicir, no que o número de solicitudes sexa superior ao de prazas ofertadas, terán opción preferente a efectos de ingreso, os alumnos e as alumnas que cursasen na proba de acceso unha opción vinculada á rama do coñecemento da ensinanza á que se pretende acceder, de acordo co disposto no Anexo V desta convocatoria. k) Maiores de 45 anos con probas específicas superadas reguladas polo Real Decreto 1892/2008, do 14 de novembro. A nota de admisión será a cualificación final obtida na proba. 10
7º PROCEDEMENTO PARA A ADMISIÓN NAS TITULACIÓNS CON LÍMITE DE PRAZAS Primeira Convocatoria (19-21 de xullo) A primeira convocatoria de matrícula en titulacións con límite de prazas do Sistema Universitario de Galicia desenvolverase entre os días 19 e 21 de xullo. * Se o solicitante aparece convocado/a na titulación da súa primeira preferencia, deberase matricular no prazo establecido, do contrario perderá todos os seus dereitos. * Se o solicitante aparece convocado/a nunha titulación que non sexa a de primeira preferencia poderá esperar a matricularse nela en tanto non se peche a matrícula nas titulacións solicitadas con maior preferencia. No caso de matricularse nela ou en calquera outra titulación sen límite de prazas, decae dos seus dereitos de continuar no proceso de ingreso en titulacións con límite de prazas. Sucesivas convocatorias de matrícula Despois da primeira convocatoria de matrícula poden quedar prazas vacantes como consecuencia de que algún dos alumnos convocados non formalice a súa matrícula. Neste caso, sobre as prazas vacantes realizarase unha reasignación automática de acordo cos mesmos criterios cos que se fixo a primeira convocatoria e convocaranse aos alumnos para formalizar a matrícula, nos prazos sinalados anteriormente, a partir do segundo prazo de matrícula (do 26 ao 28 de xullo). As sucesivas convocatorias de matrícula anunciaranse nos LERD, na CiUG e vía Internet. Nestas convocatorias sucesivas os alumnos/as pódense atopar nos seguintes supostos: * Se o alumno/a é convocado para matricularse na titulación da súa primeira preferencia, deberá facer a matrícula, pois do contrario perderá todos os seus dereitos. Enténdese por primeira preferencia aquela que o alumno/a solicitou no primeiro lugar ou en lugares sucesivos no caso de se esgotaren as prazas ("peche") das titulacións solicitadas nas primeiras preferencias. * Se o alumno/a é convocado a matricularse nunha titulación de menor preferencia, poderá facer a matrícula ou non. De facela, a matrícula considerarase firme e non terá a oportunidade de cambiarse a outra titulación. De non facela, poderá esperar a matricularse nunha titulación de maior preferencia ata o peche da matrícula nestas, o que se anunciará coa publicación dos sucesivos listados de admitidos e de espera. O peche de matrícula dunha determinada titulación implica a desaparición automática das listas de espera, de xeito que non se volverá a abrir de novo a matrícula desa titulación. Os alumnos que, figurando nas listas de espera, se matriculen nunha titulación sen límite de prazas decaen do seu dereito a seguir inscritos en ditas listas, considerándose firme a devandita matrícula. 11
8º TITULACIÓNS DO SUG CON LÍMITE DE PRAZAS PARA O CURSO 2010-2011. No Anexo II recóllese a relación de titulacións con límite de prazas existentes nas tres universidades do Sistema Universitario de Galicia (SUG) para o curso 2010-2011, con indicación do código da titulación e do número de prazas existentes en cada unha delas. Santiago de Compostela, 1 de xuño de 2010 Asdo.: Pedro Armas Diéguez Presidente da CiUG EXCMO. SR. CONSELLEIRO DE EDUCACIÓN E ORDENACIÓN UNIVERSITARIA.- EXCMOS. E MAGFCOS. SRES. REITORES DAS UNIVERSIDADES DA CORUÑA, SANTIAGO E VIGO.- ILMO. SR. SECRETARIO XERAL DE UNIVERSIDADES.- SRES/AS. ENCARGADOS/AS. DOS LERD.- SR. RESPONSABLE DO SASUGA.- 12
13