Proxecto de orde do de de 2015, pola que se regula a composición, organización e funcionamento dos consellos de saúde de área.

Transcrição

1 Proxecto de orde do de de 2015, pola que se regula a composición, organización e funcionamento dos consellos de saúde de área. A Lei 14/1986, do 25 de abril, xeral de sanidade establece o mandato de que os servizos públicos de saúde se organicen de forma que sexa posible articular a participación cidadá na formulación da política sanitaria e no control da súa execución. A Lei 7/2003, do 9 de decembro, de Ordenación sanitaria de Galicia de 2003 configurou as comisións de participación cidadá como órganos de participación no ámbito das áreas sanitarias, desenvolvendo o seu réxime de organización e funcionamento mediante orde da Consellería de Sanidade do 27 de maio de A Lei 8/2008, do 10 de xullo, de saúde de Galicia, modifica a denominación dos órganos de participación, sinalando, no seu artigo 25, que os consellos de saúde de área son os órganos colexiados de natureza consultiva a través dos que se articula a participación comunitaria no terreo das áreas sanitarias. Ademais, a modificación esténdese á composición dos propios consellos de saúde de área ampliándose o número de membros para fomentar a participación de sectores da sociedade que antes non estaban representados. O parágrafo 3 do artigo 25 da lei 8/2008, do 10 de xullo, sinala que por orde da persoa titular da Consellería de Sanidade determinarase a composición dos consellos de saúde de área e os sistemas de asignación de representantes de entre as distintas organizacións e entidades representadas no seu seo, así como os mecanismos para a súa designación. Así mesmo, o paragrafo 6 establece que por orde da titular da Conselleria de Sanidade estableceranse as normas xerais de organización e funcionamento dos consellos de saúde de área. A participación social na xestión do Sistema Público de Saúde de Galicia é un dereito da cidadanía e, igualmente, un valor social e un instrumento de

2 cooperación para a mellora da saúde e o benestar de toda a poboación, polo que é necesario regular a composición e o réxime de funcionamento dos Consellos de Saúde de área. Na súa virtude, de conformidade co establecido no artigo 43.3 da Lei 1/1983, do 22 de febreiro, reguladora da Xunta e da súa Presidencia, DISPOÑO Artigo 1. Obxecto. A presente orde ten como obxecto establecer a composición e as normas xerais de organización e funcionamento dos consellos de saúde de área. Artigo 2. Ámbito territorial. O ámbito territorial de cada consello de saúde corresponderase co ámbito territorial establecido para cada estrutura organizativa de xestión integrada (EOXI) do Servizo Galego de Saúde, conforme ao establecido no Decreto 168/2010, do 7 de outubro. Artigo 3. Composición dos consellos de saúde de área. 1. De conformidade co establecido no artigo 25.2 da Lei 8/2008, do 10 de xullo, de saúde de Galicia, os consellos de saúde de área, estarán compostos por presidente/a, vicepresidente/a, vogais e secretario/a. 2. Son vogais dos consellos de saúde de área: a) Tres persoas representantes das entidades locais comprendidas dentro do ámbito territorial de cada consello designadas pola Federación Galega de Municipios e Provincias, entre os Alcaldes e alcaldesas ou os concelleiros/as con delegación de competencias en materia de saúde. b) Unha persoa representante das agrupacións ou federacións de asociacións veciñais, con actuación no ámbito de cada consello, designada segundo as solicitudes presentadas polas respectivas agrupacións ou federacións.

3 c) Unha persoa representante das organizacións empresariais intersectoriais mais representativas da Comunidade Autónoma de Galicia, designada pola federación ou confederación correspondente. d) Unha persoa representante das organizacións sindicais presentes na mesa sectorial de negociación do Servizo Galego de Saúde, designada por acordo conxunto das organizacións. e) As persoas titulares das direccións de procesos asistenciais, de recursos humanos e de recursos económicos de cada estrutura organizativa de xestión integrada. f) A persoa responsable de saúde pública da xefatura territorial da Consellería de Sanidade que corresponda. g)unha persoa representante da Consellería de Sanidade, nomeada pola persoa titular da consellería. h) Dúas persoas representantes das asociacións de pacientes con actuación no ámbito territorial do consello de saúde, propostas polo Consello Asesor de Pacientes. 3. Poderán designarse vogais suplentes para cada unha das representacións a proposta das mesmas entidades que fixeran a proposta das persoas titulares. A suplencia poderá ser de carácter permanente ou concreta para cada reunión do consello. 4. Na composición dos consellos de saúde de área procurarase unha presenza equilibrada de mulleres e homes. Artigo 4. Nomeamento e cese. 1. Os membros do consello de saúde de área serán nomeados e cesados por acordo da persoa titular da consellería con competencias en materia de sanidade, a proposta de cada unha das representacións que se indican no artigo anterior.

4 2. O nomeamento realizarase por un período máximo de catro anos, sen prexuízo de que podan ser reelixidos sucesivamente, sempre que gocen da representación requirida. 3. Coa finalidade de favorecer a participación as entidades e organizacións poderán propoñer a renovación das persoas que as representen por períodos de tempo que non serán inferiores aos dous anos. 4. Os alcaldes ou alcaldesas e os concelleiros ou concelleiras terán o carácter de membros do consello en tanto continúen no mesmo cargo que ostenten no momento do seu nomeamento. Artigo 5. Funcións dos consellos de saúde de área. Conforme ao establecido no artigo 25,5 da Lei 8/2008, do 10 de xullo, de saúde de Galicia, as funcións que lles corresponden a cada consello de saúde de área son as seguintes: a) Proporlles aos órganos de dirección da EOXI aquelas medidas de carácter sanitario que contribúan a elevar o nivel de saúde da poboación. b) Coñecer e emitir informe sobre os documentos estratéxicos da EOXI e ser informados da súa avaliación. c) Coñecer a memoria anual da EOXI, para os efectos do seguimento e a avaliación da xestión. d) Coñecer e ser informados dos contratos de servizos sanitarios, dos concertos e dos programas de subvencións feitos na EOXI. e) Propor medidas dirixidas a mellorar a xestión sanitaria da EOXI. Artigo 6. Presidencia. 1. A presidencia de cada consello de saúde de área correspóndelle á persoa titular da xerencia de xestión integrada da EOXI respectiva. 2. Son funcións da presidencia do consello de saúde de área: a) Representar ao consello de saúde.

5 b) Dirixir, promover e coordinar a actuación do consello. c) Acordar a convocatoria de sesións ordinarias e extraordinarias. d) Fixar a orde do día das sesións, tendo en conta as propostas e peticións presentadas polos membros. e) Presidir as sesións, moderar o desenvolvemento dos debates e suspendelos por causas xustificadas. f) Dirimir os empates co seu voto para os efectos da adopción de acordos do consello. g) Visar as actas e certificacións dos acordos adoptados. h) Solicitar a colaboración que estime pertinente das institucións, autoridades, organismos, entidades, asociacións e particulares, así como invitar a participar no pleno ou nas comisións que, no seu caso, podan crearse, a persoas expertas de recoñecida competencia nos asuntos de que se trate. i) Requirir, no nome do consello, información complementaria sobre asuntos que se sometan a consulta, sempre que a información sexa necesaria para a emisión dun informe, ditame ou estudo. j) Realizar o nomeamento e o cese da persoa titular da secretaria do consello. k) Elaborar o informe anual que será sometido ao pleno para a súa aprobación. l) Aquelas outras funcións que lle sexan legal ou regulamentariamente outorgadas. Artigo 7. Vicepresidencia/s. 1. Corresponderalle a vicepresidencia á persoa titular da xerencia executiva de xestión integrada. Poderán existir vicepresidencia primeira e segunda, se na estrutura existe mais dunha xerencia executiva. A designación das persoas titulares da vicepresidencia primeira e segunda correspóndelle á persoa titular da xerencia de xestión integrada. De non existir a xerencia executiva, ocupará a vicepresidencia, a persoa titular da dirección de procesos asistenciais da estrutura organizativa de xestión integrada.

6 2. A persoa titular da vicepresidencia, ou da vicepresidencia primeira, no seu caso, substituirá á persoa titular da presidencia do consello nos casos de vacante, ausencia ou enfermidade e colaborará en todos os asuntos nos que sexa requirida a súa participación. Artigo 8. Secretaría. 1. Actuará como secretario/a, con voz pero sen voto, un empregado público ou empregada pública adscrito á Estrutura organizativa de xestión integrada correspondente, proposto/a pola persoa titular da xerencia de xestión integrada. 2. Correspóndelle á persoa que sexa designada para ocupar a secretaría as seguintes funcións: a) Efectuar a convocatoria das sesións, seguindo as instrucións da persoa titular da presidencia do consello e realizar as notificacións aos membros do mesmo. b) Asistir ás sesións que se convoquen con voz pero sen voto. c) Recibir os actos de comunicación dos membros con o órgano, e polo tanto, as notificacións, peticións de datos, rectificacións ou calquera outra clase de escritos dos que deba ter coñecemento. d) Preparar o despacho dos asuntos, redactar e autorizar as actas das sesións. e) Expedir as certificacións das consultas, dictames e acordos aprobados. f) Comprobar as acreditacións dos membros suplentes con carácter previo ao inicio de cada reunión, se fose o caso. g) Outras funcións inherentes a condición de secretaría. Artigo 9. Dereitos e obrigas dos membros do Consello. 1. Os membros dos consellos de saúde de área terán os seguintes dereitos: a) Recibir, cunha antelación mínima de corenta e oito horas, a convocatoria da sesión e o orde do día, quedando á súa disposición no mesmo prazo a información e documentación correspondente.

7 b) Participar nos debates das sesións e emitir o seu voto, expresar o sentido do mesmo e os seus motivos, e, no seu caso, formular votos particulares. c) Formular rogos e preguntas. d) Obter a información necesaria para cumprir as funcións asignadas. e) Outras funcións inherentes a súa representación. 2. Son obrigas dos membros dos consellos de saúde de área: a) Asistir ás sesións para as que foran convocados e participar nos seus debates e traballos. b) Gardar a debida reserva en relación coas actuacións e informacións que, por decisión dos membros, se declaren reservadas. Artigo 10. Funcionamento. 1) O pleno de cada consello de saúde de área estará constituído pola totalidade dos membros do mesmo. Poderán constituírse comisións ou grupos de traballo para o estudo e informe de asuntos concretos por acordo do pleno. 2) Os consellos de saúde de área reunirase en sesión ordinaria unha vez ao semestre e, de xeito extraordinario, por convocatoria da persoa titular da presidencia ou por petición dunha cuarta parte dos seus membros. 3) Para a valida constitución do pleno, a efectos da celebración de sesións, deliberacións e toma de acordos, requirirase a presencia das persoas titulares da presidencia e da secretaría do consello, ou das persoas que as substitúan, e da metade, polo menos, dos seus membros. Artigo 10. Convocatoria. A convocatoria remitirase aos membros cunha antelación mínima de corenta e oito horas á celebración da sesión, é indicará a data, hora e lugar da reunión, así como a orde do día, quedando a súa disposición, no mesmo prazo, a información e documentación correspondente.

8 A convocatoria deberá conter ademais a acta da sesión anterior, para a súa aprobación. Artigo 11. Adopción de acordos. 1. Os acordos serán adoptados por maioría simple de votos dos membros presentes. En caso de empate o voto da persoa titular da presidencia dirimirá o resultado. 2. Non poderá ser obxecto de deliberación ou acordo ningún asunto que non figure incluído na orde do día, salvo que estean presentes todos os membros do consello e sexa declarada a urxencia do asunto polo voto favorable da maioría. 3. De cada sesión que celebre o consello levantarase unha acta que especificará necesariamente as persoas asistentes, a orde do día, as circunstancias do lugar e tempo da reunión, os puntos principais das deliberacións, así como o contido dos acordos adoptados. Na acta deberá figurar, a solicitude dos membros, o voto contrario ao acordo adoptado, a súa abstención e os motivos que a xustifiquen, así como, o sentido do seu voto favorable. Artigo 12. Regulamento de funcionamento interno. Cada consello de saúde de área poderá elaborar o seu propio regulamento de funcionamento interno. O regulamento deberá ter en conta o disposto na presente orde e na normativa vixente. Disposición adicional primeira. Gasto público. O funcionamento dos consellos de saúde de área non suporá incremento do gasto público e será atendido polos recursos humanos e materiais existentes nas xerencias de xestión integrada do Servizo Galego de Saúde.

9 Disposición adicional segunda. Réxime supletorio. Con carácter supletorio, aplicarase o disposto na Lei 16/2010, do 17 de decembro, de organización e funcionamento da Administración xeral e do sector público autonómico de Galicia, respecto aos órganos colexiados. Disposición derrogatoria única. Derrogación normativa. Quedan derrogadas as disposicións de igual ou inferior rango que se opoñan ao establecido nesta orde e, en particular, a Orde da Consellería de Sanidade do 27 de maio de 2015, pola que se aproba a composición, organización e funcionamento das comisións de participación cidadá. Disposición final primeira. Desenvolvemento da orde. Facúltase á persoa titular da xerencia do Servizo Galego de Saúde para ditar cantas instrucións sexan precisas para o desenvolvemento desta orde. Disposición final segunda. Entrada en vigor. Esta orde entrará en vigor aos vinte días da súa publicación no Diario Oficial de Galicia. Santiago de Compostela,